ОХУ-ын төрийн өмчит Пуужин-Сансрын нэгдсэн корпораци сарыг эзэгнэх амбийцтай төлөвлөгөө боловсруулжээ. Тодруулбал, 2050 он гэхэд дэлхийн дагуул дээр бааз байгуулж ашигт малтмал олборлох гэх мэт олон төслүүдийг хэрэгжүүлэхээр төлөвлөсөн байна. Төлөвлөгөөгөө хэрэгжүүлэх эхний алхмаа ойрын үед хийх гэж байгаа талаар “Экспресс газета” цахим сонин өнөөдөр мэдээллээ.
Эхний ээлжинд сар руу олон тооны аппаратыг буулгах бөгөөд тэдгээр аппарат нь бааз байгуулахад тохиромжтой гбайршлыг тандах юм байна. Дараагийн ээлжинд “Холбоо” нэртэй ачааны хөлгийг хөөргөх гэнэ. Бааз байгуулахад шаардлагатай ачаа барааг хүргэх пуужингуудыг 2017-2030 оны хооронд байгуулах бөгөөд 2031 оноос бааз байгуулах ажил саран дээр эхлүүлэхээр төлөвлөжээ. Энэ үе шат нь 2031-2040 оны хооронд үргэлжилнэ. Энэ үед мөн саран дээр сансрын нисгэгчдийг буулгах юм байна. Төгсгөлийн үе шат 2040-2050 онд үргэлжлэн явагдсанаар саран дээр бааз байгуулах ажил дуусах аж. Хэрвээ энэ төлөвлөгөө хэрэгжвэл сарыг цаашид сансрыг эзэгнэх төлөвлөгөөний нэг хэсэг болгон ашиглах боломжтой гэж үзэж байгаа юм байна.